留白居酒屋 (Closed)

今日食屯門景峰站附近，或者稱為紅橋，出晒名多嘢食嘅地方食晚飯。決定左食呢間新開唔係好耐嘅 留白居酒屋！食居酒屋第一樣要叫嘅就係串燒，開胃又可以送酒，叫左一串鹽燒翠肉瓜，一串醬燒鮑魚（兩隻）同埋一串鹽燒一口牛。燒出嚟係非常有火候，非常香口，鮑魚燒過都食得出係好新鮮，口感一流，而翠肉瓜既入味亦唔硬，一口牛熟度剛好，豐富肉汁唔會乾身。主食方面叫左吉列海老烏冬，另外加個炸魚手指。烏冬嚟講唔算太特別，做返居酒屋該有嘅水準，但係炸手指！真係超正！勁鬆脆之餘入面嘅魚肉係勁彈牙同香口，強烈建議主食烏冬之餘叫多個嚟搭配！主食之後再叫左啲小食，松葉蟹甲羅燒，一樣燒得好香，份量適中，值得加點一個試下！另外仲有蒜蓉燒茄子，味道似夜市檔嘅感覺，真係好濃郁蒜蓉香，食完一定要飲多啲水，哈哈～或者好似我地咁，一人叫一杯鬼佬涼茶（啤酒）飲下，主要分兩隻premium malts suntory 同埋一番榨，兩隻本身香味上面比一般lager啤酒會濃少少，味道分別唔會太大，亦唔會好苦，適合大多數人口味。臨走前，見到門口貼住有預訂海鮮服務，聖誕一大班人可以諗下訂定幾打蠔嚟食😋😋