Burger Deli (Closed)

天氣漸涼，又係時候去郊遊，西貢有山有水有美食，絕對係一個好選擇。西貢有好多美味食肆，Burger Deli絕對係其中之一，佢既homemade漢堡，好有水準！餐廳只有室外座位，而且只有三四張枱，講真，我地四個大人一個小朋友，都幾逼夾，坐得唔算舒服，不過唔緊要，我反而覺得呢度好切合西貢既偽外國氣氛，好似去左外國食漢堡咁呀！餐廳打正旗號係賣漢堡，最正當然係佢既burger，以安格斯牛肉新鮮手打而成，必食！但如果你唔好牛，亦有其他選擇既，好似熱狗、脆蝦堡、雞包、魚柳包等等。我揀左最普通既Classic Beef，加芝士同菠蘿。一啖咬落去，熱辣辣，牛肉鮮嫰多汁，好juicy，夾埋酸酸甜甜既菠蘿，同埋新鮮既洋葱同生菜，感覺好fresh好清新。外層既麵包都經過烤焗，略帶香脆，呢個包，可以攞滿分！食漢堡當然要配薯條，呢度提供既係我鍾意既粗薯條(前)，good！我見到餐廳仲有較特別既番薯條(後)，就另外叫了一份。番薯條比薯條幼身，甜甜地，脆脆地，送汽水一流！