Jaspas Restaurant (Closed)

夏天一定要坐入面涼冷氣，凳太大張，走廊又太窄，所以坐得幾迫下。落單要講英文，因為菜係新鮮熱辣煮出嚟，所以上菜都要啲時間。*Jaspas  Special  Pizza $170薄餅底係薄脆底，唔會好硬，依然有少少麵包鬆軟嘅質感，面頭有好多配料，紅椒青椒肉粒蘑菇片辣肉腸，惹味又多層次感，最重要係芝士份量啱啱好，拉絲之餘又唔會太膩。Mac & cheese $170焗芝士通心粉未免太邪惡啦呱，完完全全係芝士+通心粉，通心粉有坑紋，掛汁掛起啲芝士醬，芝士醬非常濃郁，完美同通心粉融為一體，面頭有焗到焦香嘅車打芝士，拉絲超cheesy，一啖接一啖，但芝士相對好容易食膩。Chicken fajitas $170熱辣辣嘅鐵板，上菜吱吱聲，雞胸肉燒到焦香，一點都唔會乾柴，肉質好嫩滑，份量又多。底下有紅椒青椒條，可惜鐵板太多油，啲菜好油膩。有4片墨西哥薄餅，烘熱左又非常軟熟，仲有墨西哥辣椒同埋經典墨西哥醬，酸忌廉牛油果醬莎莎醬。用薄餅包起雞肉青椒，再點醬，好有墨西哥風味。