小田田主題餐廳 (Closed)

我哋上星期去一間叫小田田嘅餐廳食晚餐，食得好開心。我哋叫咗一個香辣森巴醬烤原隻美國去骨春雞$158，佢雖然話叫香辣,但係個辣味係適中好多人都接受到,佢嘅森巴醬好拿手，個醬汁係用不同嘅材料配製，好少機會食到咁有質素嘅醬汁，雞皮烤得脆卜卜，原隻春雞鮮味無窮，雞肉嫩滑可口，雞皮跟雞肉放在口腔內，有兩種口感，配上特製醬汁，其味無窮。食完呢個香口嘅雞跟住飲咗杯熱情草莓奶昔沙冰$30,跟餐係半價$15,呢杯沙冰有草莓嘅香甜,奶味濃郁,奶昔滑溜 ,幼細嘅沙冰,真係冇得彈。德國咸豬手$168,德國嘅品牌鹹豬手世界聞名,佢個表皮軟滑非常，一啲肥膩都冇，肉質嫩滑可口，佢嘅鹹香做得好窩心，真係冇得輸。呢個紫薯心太軟配雪糕窩夫$ 48，紫薯嘅清甜，香濃奶味嘅雪糕，加上鬆化嘅窩夫一起吃，其味無窮。另一個煙肉芝士焗蠔$38，焗出嚟煙肉嘅肉香，煙韌得嚟又有咬口，濃滑芝士嘅香，仲有蠔嘅鮮，三種優質材料配合，更能夠把蠔嘅鮮味提升到更高境界，令人食後有回味嘅感覺。最後有個玫瑰花茶$26，食完濃味菜式之後，再飲呢個玫瑰花茶，玫瑰嘅幽香，飲後令你心曠神怡。士多啤梨蛋糕，鬆軟非常，既香且甜，加$10妳就可以享用咁有質素嘅甜品。