老掌櫃東北菜館 (Moved) New Location

一客口水雞跟菜飯、一客素三鮮餃子（饀料係白菜仔＋甘筍＋木耳＋冬菇）同兩杯酸梅汁，呢兩個午餐足夠兩個女生些牙食。口水雞比想像大份，唔係雞皮多過雞肉，層皮薄薄地夠爽，皮下脂肪失蹤，有啲雞件仲有少少軟骨。肉夠入味，唔鞋口，配埋個麻辣醬汁真係超級好送飯。麻辣醬汁冇冚咗雞味，佢唔勁辣，會令你個咀有少少麻，越食越想食。雞件下面喺一堆非常幼身嘅青瓜絲，同雞肉一齊食真係好夾，如果冇咗呢堆青bb，成碟雞會失色。食到最尾，開始攞紙巾出嚟抹鼻水，呢個時候飲一啖酸梅汁，成個人即刻爽晒！食到咁上下，個素三鮮餃子先現身。由於碟雞濃味，顯得餃子份外清新，全靠佢中和返味蕾，一濃一淡呢個組合好搭配。餃子皮唔厚，饀料亦豐富，不過鍾意阿純出品多啲。諗起阿媽鍾意食雞，呢度絕不可走雞，不過現場坐得迫，肥師奶見到會實會扁咀，買外賣返去就 win win。