四海意粉屋

Open Now

Now Closed

經過樓下，好多宣傳牌、海報，比較多食肆集中喺呢棟工廈4樓，揀唔啱一間都進可攻退可守。去到已經上午10:40，同行友人點早餐2份，但本人想點午餐，身材嬌小嘅寫單靚姐話11點開始有，也就等15分鐘。5分鐘後，靚姐話師傅可以提早煮，所以揀咗份 絕味鮮茄免治牛肉飯配蜜糖孜然燒烤雞脾，本身諗住呢類工廈速食食肆唔係觀塘嗰堆玩文青、高檔、優皮feel，因而不寄予厚望，然而又冇揸流攤，賣相實而不華，飯量大概一點五碗，免治牛肉醬汁冇只用罐頭現成，有自己加過料，肉碎足，燒雞脾居然比一般茶記更像樣，孜然味雖則淡，但隻脾燒得好金黃色，冇燶又濕潤，如果佢搭些少雜菜已經追到啲打卡餐廳質素。夾咗友人幾撮早餐米粉，係同平時茶記、粉麵舖用嘅有啲出入，但又唔係新竹嗰款咁幼身，佢粗身啲、呈少許透明、嚼口彈牙，配埋泰式酸辣湯底都幾醒胃。熱檸茶都幾濃郁，檸檬一路浸住飲到尾都冇澀味，用嘅非渣嘢。兩早一午餐盛惠$122，咁嘅質素，抵到爛。