水門雞飯 (汀角路) (Closed)

老公係愛雞之人，行過見到呢間鋪頭招牌有隻雞，佢就話今晚要食雞，跟住就入左去。坐低睇吓menu，見到個二人自選套餐勁抵食，有主食、小食同飲品各款 x 2，仲有甜品添，都唔駛200蚊，緊係要揀左佢啦。水門雙併飯 (+$5)：海南雞又白又滑又唔肥，另外佢有兩款醬跟上，但唔點醬都好食。炸雞唔會太多油，幾香口；油飯又唔會話油淋淋，味道鹹鹹地。旁邊仲有碗糊椒冬瓜湯，辣辣鹹鹹，夠晒味。鳳尾蝦泰式金邊粉 (+$10)：鳳尾蝦有4大隻，食落彈牙。金邊粉甜甜酸酸，裡面有豆卜雞蛋等配料，整體炒得幾好。泰式炒通菜：通菜份量正常，唔多油，炒得爽口，幾啱我口味。沙嗲豬肉串燒：豬肉乾身，燒得幾香，點埋我鐘意嘅沙嗲就已經覺得OK。芒果糯米飯 (+$15)：芒果唔太甜，糯米飯軟熟，甜甜地，淡淡椰漿味，呢個口感都幾好，食完就滿足晒。椰青 (+$15) 及凍美祿：美祿夠凍夠大杯，又夠美祿味。椰青都係夠凍，好清甜，椰肉都好好味。