榕基滷水專門店 1992 (Moved) New Location

💛榕基滷水專門店1992而家由兩位年輕嘅店主打理，食嘢嘅時候都會見到佢哋！除咗堂食，仲有好多人選擇外賣滷水，為晚餐加多個餸。而堂食就可以選擇套餐，自由配搭：先揀主菜(五選一)，再揀飯麵(四選一)同小食(三選一)；我哋就揀咗招牌滷水獅頭鵝($58)同滷水南姜豬手($42)🌿 招牌滷水獅頭鵝拼手工湯麵 $60大家一定要試吓榕基嘅川麻辣汁！夠香夠辣夠麻，同湯麵一齊食一流😛如果想飲吓個雞湯，可以叫店員將麻辣汁另上，咁就可以保留湯底原有嘅味道。鵝嘅份量非常足夠，有近5至6件鵝；我哋另外加咗滷水蛋($5)，都幾好食。🌿 滷水南姜豬手拼湯麵 $44相比滷水鵝，呢度豬手就比較遜色。豬手嘅賣相唔錯，咬落有滿滿嘅膠質，不過味道較鹹，而且冇咩薑味。因為味道比較重，個人覺得豬手比較襯同白粥或者白飯一齊食。🌿小結：食物嘅選擇足夠，小食亦好好味 ！餐廳亦好細心，會額外俾一個碟客人放骨 ，食物擺設又精緻，令人食得好舒服。而且份量足夠又抵食，係好味抵食又親民之選！