稻田食堂

Open Now

Now Closed

提到葵芳美食，好多人都會諗到葵廣，但其實行遠少少，附近都有好多有質素小店，今日就來到呢間「稻田食堂」，餐廳選擇有好多，主打嘅日式便當都有超過十款，又點可以唔試下？福岡便當 : 好豐富嘅便當，有吉列豬扒、炸餃子、日式園蔥魚餅、螺肉及咖哩飯，吉列豬扒雖然唔係厚切，但肉質鮮嫩多汁；炸餃子餡料滿滿，外皮炸到脆卜卜，再加埋魚餅及螺肉，食完感覺滿足。午市定食有主食、湯及螺肉，飯可以揀和風燒汁或咖哩汁，另外除咗主食外，每一個餐都會額外附送唔同小食，可以話相當抵食。汁煮豬軟骨燒汁丼 :豬軟骨炆得好淋好入味，醬汁味道甜甜地，配飯食一流；附送嘅小食係日式炸雞，外脆內軟夠juicy，好味道。蒲燒鰻魚燒汁丼 :鰻魚燒得好香，肉質軟熟而唔鬆散，吸收晒醬汁下風味十足；附送嘅吉列雞扒肉厚多汁，炸得鬆化香口。附送嘅麵豉湯都有驚喜，有三文魚及蘿蔔粒，味道鮮甜，充滿三文魚味，一碗真係唔夠喉。