韓閣 (Moved) New Location

田園沙律拼炸雞球跟芝士醬 $46，大大一盤好多沙律菜，有齊幾款蔬菜，仲好好爽脆，配酸酸地沙律汁好開胃清新。抵食在於有埋炸雞，即叫即炸熱辣辣，咬落爆出肉汁，雞肉微彈好香口，配沙律食就唔會膩。大韓無骨豬手 （例牌） $68，同樣分量頗多，滿滿一碟豬手肉，已經去骨方便進食。豬手有好多骨膠原，充滿彈性，豬皮微彈帶爽，肉質不算好嫩，但軟腍肉味重。用附上的紫生菜、泡菜、醃蘿蔔、韓式豆瓣醬包著豬手同食，咸中帶辣，爽口加彈牙，層次同味道都豐富左。夢幻蝶豆花特飲，跟餐可加$12仲有靚靚夢幻紫色特飲，由藍變紫，好玩又好飲。呢度飲品內仲有埋蝶豆花，原來用呢種花沖泡出來。紅豆抹茶牛奶，同樣跟餐加$12，紅豆粉綿香甜，但抹茶味偏淡。牛肉雜菜手卷 $38，手卷幾扎實飽肚，餡料有牛肉、醃黃蘿蔔、青瓜、紅蘿蔔，蔬菜同肉比例各半，幾健康簡單的韓式料理。芝士岩漿炒飯 $68，主角來了，期待的芝士飯，用熱熱鐵板，放上雞蛋、芝士同豚肉炒飯。襯熱拌勻芝士岩漿炒飯，芝士拉絲效果理想，雞蛋令炒飯更滑更香，加上濃郁芝士，整個炒飯都好正，果然好邪惡，太吸引了，我地不停食，尾般的確有點膩，所以2-3人分享都夠食。