CoCo壹番屋 (Closed)

呢間座落於APM邊皮死角位置嘅「CoCo壹番屋」，小弟經常路過，但係都由於晚飯時間排隊現象過激嘅關係，令小弟每次都望門輕嘆，過門不入。難得終於見到冇人排隊，即時拖埋女友入去試吓到底一間只係賣咖哩飯嘅舖頭點解咁把炮周時排長龍。今次點咗餐牌上嘅「吉列豬扒庵列咖哩飯」跟餐，同埋單點「牛肉庵列咖哩飯」。是日例湯係呢個鰹魚海帶煲洋蔥蘿蔔，飲落腥腥鮮鮮，但係好清甜，有啲似日式拉麵之中嘅東京醬油湯底。凍奶茶中伏，係冰奶茶甜四種味道完全分開嘅味道。「吉列豬扒庵列咖哩飯」－雞蛋冇乜蛋味，飯粒食得出用嘅係靚米，咖哩汁香得嚟唔太辣，最重點係個吉列豬扒，有豬肉味而冇豬肉嘅禽畜味，表層鬆脆，粉漿較得厚薄得宜，豬肉冇筋，只可惜冇乜肉汁。「牛肉庵列咖哩飯」－牛肉粒嘅份量小器咗啲，牛味濃之同時亦有一種類似牛尾嘅臊味。特登試埋佢個雪糕，味道太普通，曲奇唔脆，建議各位可以响跟餐時不納入點選範圍。呢兜紅色嘅物體似乎係泡蘿蔔，口感幾得意、酸酸甜甜幾消滯。食飽飽抹乾淨個嘴仔走人。