自在素食 (Closed)

因爲上星期六午飯冇乜食菜，加上嗰日係觀音誕，晚飯去食齊。自在素食門面唔係好起眼，裝修亦較舊。食肆有兩層，地下有外賣部，有點心俾堂食嘅食客自取，但裝點心嘅麵包箱打開晒，又近門口，唔多衞生。地下有少量座位，有卡位同幾張枱。大部份座位喺一樓，要行一條梯級好窄嘅樓梯，要行得好小心，尤其是落樓梯。我同老公兩個人叫咗兩碗例湯（節瓜紅蘿蔔蜜棗湯），薑汁炒豆苗，西芹百合腰果炒雜菌，１碗粟米粥。上菜超快，快餐速度。例湯夠熱，有幾嚿節瓜，紅蘿蔔，１粒蜜棗，個湯好清幾好飲。豆苗成＄８０，份量唔多，幾好食。西芹百合腰果炒雜菌份量適中鹹味剛好，材料算多，雜菌有草菇，秀珍菇，雞骳菇。呢兩味餸較油。粟米粥除咗有粟米外，仲有啲冬菇碎，紅蘿蔔碎，好味。成餐飯唔使一個埋鐘食完。，埋單＄２０２，價錢合理喇。