81手工餃子

Open Now

Now Closed

一直都好鍾意食餃子，既有澱粉質又有餡，齋食都算係營養均衡的一餐。不過，我少出街食，一般都係喺超市買番屋企蒸或煮。最近有食過Plant Sifu本地製作的多種口味素餃，又有外賣過有得餃的素餃，不過前者勁重口味，我唔識欣賞，後者又有啲貴，所以今次又上網搵下，最後嚟咗呢間舖頭外賣素餃。呢度的生餃售價合理，比起有得餃1打素餃~$70，呢度只係$50/打，而且佢的餃子飽滿程度同有得餃不相伯仲。我係自備铝盒外賣，店員都「裝」得幾好，拎到返屋企，啲餃都冇「痴」住，而我亦即時蒸咗4隻，加油+豉油嚟食。素餃子調味唔錯，唔會好寡、好淡，佢有味道之餘，又冇話搶咗素料的原味。餃子的餡料我無逐一分辨出嚟，但咬開見到有紅蘿蔔、粟米同冬菇。因為啲餃子都幾大隻，所以女仔一餐要食飽的話，我覺得6-8隻都夠，而其後當我煮麵一齊食時，我亦只係放咗2隻，點到即止。外賣時，我見呢間舖頭都幾多嘢食，呢度的素餃我會再幫襯，到時會考慮堂食試下其他嘢。