阿桂老友粉 (Closed)

上次OT黎開呢頭食野，見有間粉紅色既鋪頭勁吸睛，於是就坐低試一試佢啦！個名咁搞笑，問下啲姐姐咩係老友粉，佢地話係個湯底係獨家配料熬製而成，一定要試下喎！咁有心，一定捧場啦！佢地仲話個蓮藕粉係特登由廣西運落黎，第二度食唔到，咁更加要試啦！呢度既選擇好多，除左各式湯粉仲有埋撈米線同擔擔麵呢啲，更估唔到既係仲有飯類，真係包羅萬有！我就嗌左老友粉蓮藕粉底加豆卜同醬汁豚肉，要左酸辣小辣。蓮藕粉原來係好似薯粉咁透透地明，但又無薯粉咁彈牙咬都咬唔斷咁，都幾好食丫！至於個湯底味道真係幾特別，可以因為有豆豉落去炒，個湯底好香，當湯咁飲左幾啖哈哈！辣味無乜，建議食得辣既朋友仔嗌大啲辣啦！個醬汁豚肉味道都好似叉燒，幾爽口不錯的！同朋友食，於是嗌多個口水雞，望落好似好辣咁但食落又唔係喎！食落好香口，個雞好嫩滑而且一啲都唔肥。細細碟例牌size兩個人食岩岩好，佢仲有大碟啲既半隻雞，多啲人黎食就可以嗌佢啦，幾user friendly！