鮨三川 (Closed)

機緣巧合之下知道咗依間Omakase，平時覺得食呢類廚師發辦會好貴，不過聽朋友介紹話呢間新開做緊優惠，所以咪去試下，不過試完應該會上癮...咁誇張？先唔講其他，一入門口個侍應哥哥十分親切，原來係老闆黎，仲要係靚仔，佢話呢間係新品牌，同區仲有間居酒屋，仲好nice派左卡片比我地～咁靚仔....佢話點就點啦～鱆紅魚薄切，配個酸汁啫喱，唔錯唔錯！特別欣賞隻日本蠔，好鮮味，質感爽甜。北海道牡丹蝦好新鮮，藍色嘅蝦子好特別，配上燒左既蝦膏，非常好食。金目鯛燒香配芽蔥、燒北海道銀鱈魚，燒一燒個效果好好，成件壽司食落好香，仲唔會油淋淋。中拖羅、赤貝都好新鮮，最鍾意件海膽，紫菜脆，海膽好鮮甜，總括，用餐體驗好好，出品同經營者理念都好欣賞。（自我感覺良好）餐牌上見到「吸物」兩個字，開頭都唔知係咩嚟；原來係日式烹調嘅湯 ，無咁濃味，飲落去清清地帶出到海鮮嘅鮮味。到最後嘅甜品，原來係日本直送嘅哈密瓜，雖然我唔知邊個產地但同我喺北海道「夕張」食嘅哈密瓜味係一樣㗎～Omakase 嘅理念係將最時令新鮮嘅嘢食呈現給客人，所以下次有機會再嚟，可以食到多嘀唔同嘅日本刺身壽司...因為？平靚正囉