星巴克咖啡 (Closed)

今個月生日，所以 Starbucks 送俾我呢個普通會員仔杯飲品或者一件蛋糕。可能因為夏天，我望咗大半個月都係凍飲，不過我唔想咁快飲凍嘢又唔想換杯平時飲到嗰d咖啡，所以一直無換到。到前幾日喺FB睇到 Starbucks 出咗冷萃咖啡，仲有雲呢拿甜忌廉冷萃咖啡，就一於會一會其中一杯。因為本身對牛奶有敏感，再諗如果有其他嘢加咗就蓋過咖啡原來嘅味道，所以最後決定試冷萃咖啡！大約9:15a.m.，雪櫃前嘅冷萃咖啡易拉架已經貼咗「今日售罄」…… 都係去問一問職員啦，原來有架！於是我就加4蚊換咗杯最大size嘅冷萃咖啡。比平時飲嘅 Starbucks Americano 無咁濃烈嘅香味，淡淡地，少少少少酸咋。因為我怕凍，飲咗差不多4個鐘，不過一樣咁好飲，無變味！ 坐都坐得舒服嘅，可惜趕時間，坐咗10分鐘就要走喇。最後要多謝職員嘅生日祝福。飲完杯咖啡就睇得清楚d字喇~ 有機會要再飲！