鮮‧港式串燒吧 (Moved) New Location

觀塘出名多隱世小廚，今次去到駱駝漆大廈既串燒店，位置非常容易搵，店內環境舒適，空間感十足。仲可以見到廚房，睇住廚師煮食，感覺開揚。八時到達，都已經坐左唔少人。餐牌係雙面式設計，都好多選擇，除左串燒，炸物，連燒海鮮都有，正！見好多人都推介墨汁墨魚腸，就點左一條試試。係幾好食喎，雖然成條黑色感覺好笑，但都好香墨魚味，入面仲有粒粒墨魚粒，幾有咬口，所以之後都叫多一條。牛仔骨燒得剛剛好，juicy有牛味，不錯。燒貴妃蚌貴妃蚌肉厚鮮甜，除左蒜之外，餐廳仲落左蟹子落去，燒得唔錯呀，唔會太乾。燒豬勁肉份量比我想像中多，燒得夠乾身夠香，再配埋個泰式辣醬汁，滿足。雙重芝士薄餅呢個推介大家一定要叫，薄餅入面起多芝士，可以拉絲架，勁好食。麻吉燒中間有層年糕，外層係魚蛋，燒過之後外脆內軟，雙重口感。燒韭菜覺得大陸食過既燒韭菜係最好食，因為會落勁多孜然，呢度既燒韭菜都有落，所以覺得好好食，仲無咁油。蒜蓉金菇份量超級多，少少辣好惹味。脆卜卜豆卜無改錯名，真係勁脆勁香口，燒到金黃色，外脆內軟，正。叫埋兩枝飲品，每人都係$150，好抵食呀。