意粉屋 (Closed)

平時出街同朋友成日都會食西餐，但同屋企人反而好少。今次襯住媽咪生日，一於帶阿媽、阿爸嚟食好西（餐）！尖沙咀夠就腳方便，難得嘅係無幾可食西餐嘅兩老都聽過意粉屋，就揀來呢度食啦😆原本book咗枱七點鐘，點知因為落雨搞到遲左半個鐘，一心以為來到要重新等位，點知Waitress話張枱仲留咗俾我哋，仲係玻璃窗位置，可以睇到街景，太貼心啦！好啦，坐定定，可以嗌嘢食啦。前菜我哋叫咗哈密瓜風乾火腿伴意大利黑醋，風乾火腿就咁食會偏鹹，但火腿配埋哈密瓜就會變成絕配，呢種化學作用真係好神奇！主菜我哋叫咗3樣，第一個係芝士卡邦拿意大利粉，一嚟到已經見到個醬汁好creamy，waiter仲即場係一舊大芝士度刮芝士碎落去，一啲都唔吝嗇，個意粉嘅芝士味真係好香濃。另一個係芝士焗海鮮墨魚汁意大利飯，呢個嘅精髓都係喺個汁度，有一陣好獨特嘅鹹香味，阿爸特別欣賞😆最後就換下味，叫咗個煙肉大啡菇黑松露醬薄餅。平時嘅pizza配料來來去去果幾樣，見到呢一個係黑松露醬咁特別，所以想試吓。個pizza夠薄身，好似食緊餅乾咁，黑松露醬又好香，呢個Pizza值得一試。總括來講，好少食西餐嘅兩老都覺得好滿意，負責埋單嘅我都覺得抵曬😂