Pici

Open Now

Now Closed

之後都試過晚飯時間嚟PiCi，今日就選擇平日中午嚟食。事關呢度嘅lunch set只需要$158就已經有前菜、主菜同甜品，比起正價時段真係平好多好多。落單後店員就送上餐包，餐包係用紙袋裝住，萬一食唔晒都唔怕浪費。餐包外皮比較硬身，但裏面仍然非常鬆軟，與黑醋橄欖油簡直係絕配。前菜方面揀咗生牛肉薄片，配上藍紋芝士、合桃、火箭菜，再灑上少許檸檬汁同黑椒，入口清新又醒胃。最近鍾意咗布袋芝士，所以覺得加$25都值得食，簡單配上車厘茄同火箭菜，味道清淡而口感豐富，美味又健康。意粉我哋就揀咗胡椒芝士豬面頰肉扁麵，其實嚟呢度食重點係食佢嘅手工意粉，配上香濃嘅芝士白汁，意粉已經成為主角，當然配角豬面頰肉亦都能為意粉錦上添花。另外加$10選擇咗經典千層麵，千層麵面層充滿芝士，而且焗得比較燶，不過呢個亦都係佢哋嘅一大特色，入口其實係更香口美味。切開就見到滿滿嘅肉醬。意式奶凍夠晒香滑，配合面層嘅士多啤梨醬，真係越食越好食。呢度嘅Tiramisu都幾出名，有咖啡的香同芝士的滑，不過我就略嫌佢嘅酒味較遜色。今日能夠以每位$200有找嘅價錢，就可以食盡呢度嘅前菜、主食、再加甜品，真係非常之滿足！