嘉道理農場素食亭 (Closed)

參觀嘉道理農場，行吓行吓想飲杯熱啡，睇地圖發現有食肆就過去睇睇。食肆好似平時公園入面的小食亭咁，外面放咗幾張有太陽傘的大木枱同長木櫈，周圍有青BB 的植物，感覺似坐喺郊外野餐，部份用餐位置近馬路，間中傳嚟風馳電掣的飛車聲。飲品以外，有賣意粉、三文治、沙律，有機菜式究竟有唔有機，信就有，不信則無。難得嚟到，即管叫個有機豆渣蔬菜漢堡試吓，店員講明要等 15 分鐘。等食期間周圍望，留意到小店係由精神病康復者打理。幫襯等同支持佢地就業，有意思喎。咁單憑食物質素，值唔值得支持呢？漢堡賣相靚靚，攞上手夠熱，手感好；菜，冇啡邊，揈得夠乾身。咬一啖，估唔到用咗香草包，包包仲烘咗底，好香。菜咬落清脆，番茄有肉汁，食得到的新鮮；豆渣漢堡扒入口唔會散收收，味淡就預咗，配埋香草包、蔬菜同醬汁一齊食，個味好夾喎。好彩冇貪食叫多個鬆餅，食晒個包已覺飽。好想知小店用的蔬果同雞蛋，喺咪來自嘉道理農場呢？呢度點餐、取餐係全自助，食完嘢，將餐具攞返去櫃枱交俾職員，咪誤會去咗餐廳噃。