韓淼莊 (Closed)

因為同一條街有兩間都係食韓國菜，平時比較多去隔離嗰間，每次都好自然忽略左依間。其實本身都無諗住入嚟食，係咁岩經過見鋪裡面幾多人，生意幾好，加上自己又諗唔到食咩好就一於試下。見佢menu款式都唔少，我今次叫左公司辣豆腐湯($50)，不過因為唔食得辣，專登叫左佢走辣。依度都幾好，野食可以選擇辣度，岩哂唔食得辣嘅人。其實我覺得依個lunch set幾抵食，佢包左兩個前菜、湯同埋飲品。前菜仲可以自由選擇，我揀左豆腐同薯仔。兩樣我都覺得超好食，我諗依兩款應該都好受歡迎，過左陣已經聽到同客人講賣哂。湯同小菜都好快送到，但係主食就真係等得比較耐，唔知係咪咁岩多客人嘅原因，加上餐廳似乎都接左好多外賣單，搞到有啲做唔切嘅感覺，比較混亂。不過食物方面其實係唔錯嘅，我依個豆腐湯勁足料有超多豆腐，啲豆腐都好滑，攞黎拌飯簡直一流。而且裡面仲有窩蛋同蜆肉，蜆肉有成十幾隻，出乎我意料之外。食完啲飯之後仲有好多豆腐湯淨底，食到勁飽。覺得依個set幾抵食，而且我下次都會想再encore豆腐湯。不過餐廳服務就一般啦，希望如果下次再嚟嘅時候會有好轉。