baby café (Closed)

之前都嚟過baby café，覺得D食物唔錯。今日晌朗豪坊睇完戲，順帶再同朋友嚟食。仲發覺原來近期更新咗餐牌，有好多新菜式，望相都幾吸引。鮮茄忌廉梭子蟹意大利粉，意大利粉好夠味，要讚係完全唔乾身，醬汁好Creamy，每啖都好易入口，而且好有鮮味，值得推介。日式鴛鴦蛋包飯，配兩款醬汁，白汁及咖哩汁，而個人認為咖哩汁唔錯，少少辣，岩晒我D唔係點食得辣之人。小食有好多款，簡直花多眼亂呀! 揀咗碟推介之一嘅車打芝士是拉差焗釀蟹肉磨菇。菇菇有好多芝士包住，入面亦有蟹肉碎，味道好夾，有少少辣辣地，好味!我哋仲點咗瓶Sangria碰杯，水果酒調配得剛剛好，酒味不太濃，浸埋多款水果，包括士多啤梨、橙 、蘋果、檸檬，不過就切得比較大舊，要用羹嚟食，水果好新鮮，令整個酒味道帶點甜甜地，好易入口，一口接一口!呢餐好豐富，而且食物質素唔錯。