嶼坊

Open Now

Now Closed

今日喺度 staycation ，包早餐喺1樓餐廳 ，餐廳非常闊落， 燈光柔和， 座位舒適， 牆上的有魚嘅裝飾 ，好有個性， 不過窗外嘅景色就差啲， 大片爛地， 應該係起緊樓， 遲啲連個爛地view都冇埋。 呢度嘅早餐收＄258加一， 價錢唔平 ，但係就非常豐富， 好多嘢食， 最開心係見到有好多新鮮生果蔬菜， 食完蔬果跟住就係庵列， 朝早都有燒火腿， 煙三文魚， 各式麵包都好正， 切咗一大塊果仁麥包， 烘到脆卜卜， 搽啲牛油， 又香又脆又健康 。跟住就食粉麵 ，十幾樣餸菜任揀， 粉麵都有好幾款 ，我哋就鍾意幼麵同埋河粉， 可以揀牛腩或者魚蛋做餸， 咖啡奶茶任飲， 生果都好多， 有布冧，香蕉， 香梨 ，蜜瓜， 西瓜，菠蘿 ，藍莓 ，應有盡有 。服務都好好， 侍應成日留意住你，食完嘢換碟收碟，要唔要加咖啡奶茶， 五星級嘅服務， 大品牌嘅酒店都係唔同啲。 早餐可以六點半食到十點半， 食完仲可以喺附近行過靚圈， 真係享受。