老鍋台式火鍋 (金馬倫道) (Closed)

一段時間無食台式火鍋，真係好想念麻辣火鍋嘅味道，所以預約咗間台式火鍋店一嚐久違嘅滋味。可惜用餐當日相當熱氣、生埋痱滋，所以就無選擇到麻辣湯底，再見了我的鴨血，期待已久～可惜啊！最後揀咗未試過嘅酸菜白肉鍋，見到menu寫湯底包埋白肉同埋不同嘅蔬菜等，感覺十分豐富。所以嗌火鍋配料時都無叫太多款式。湯底先上，待滾時打開才發現料真係這麼多！有好多嘅白肉、粟米、蕃茄、冬菇同埋寬粉等等。湯底嘅酸菜味仲好出，蔬菜同白肉都吸晒啲精華，帶點偏酸嘅味道。我特別鐘意裡面嘅寬粉，煙煙韌韌咁幾有彈力，不過一路煲佢會變軟咗無咁煙韌。我地嗌左個小食，係比較少係餐廳會搵到嘅臭豆腐，就係呢間台底火鍋店搵到！臭豆腐炸得超香脆，酷似響鈴嘅脆度，再蘸埋醬汁同酸菜食確係好爽！火鍋配料有半份極品水餃、好有特色嘅千張豆葉紙同埋台灣麵。極品水餃肉幾厚，仲有蝦係入面。千張豆葉紙幾似腐皮，但口感再彈性啲同埋厚啲。另外台灣麵夾埋酸菜湯都唔錯，同埋麵質好滑。我地仲多點咗手切牛肩肉，牛味好濃同埋切得厚薄適中，食落都好有口感！飲品有杭菊露同埋冬瓜茶，兩者都幾夠味又唔會太甜！