象泰 (Closed)

自從雅都開咗Food Court 後，睇完戲都唔洗突登行返去商場搵嘢食。第二次嚟到象泰，自己餐廳空間始終坐得舒服啲，唔怕有人搭枱。次次食泰菜都會嗌份生菜包代替主食，用生菜嚟搭配肉類，比起飯麵更高纖有營，輕盈啲又無咁飽滯。豬頸肉切成幼條，脂肪比例多，口感比較彈嫩；加入乾蔥、香葉、辣椒拌炒，味道酸辣偏鹹，夾入清爽嘅生菜中正好中和返，加埋裡面啲辣椒籽食落卜卜脆幾有口感。米紙卷皮薄剔透，一客有六件，包入切絲蘿蔔、粉絲、青瓜、生菜、鮮蝦同扎肉片，餡料飽滿，清新又不乏飽足感。蘸上伴碟嘅特製醬料，味道有啲似燒鴨嘅酸甜醬，令口味增添一點清甜，更惹味開胃。蠔仔蛋煎好再放上鐵板，鐵板屬於裝飾，無煮食或加熱作用同預期中嘅jarjar聲有啲落差。蛋應該無加入麵粉，食落滑嫩、充滿蛋香；蠔仔夠大隻厚肉，雖然有幾隻有啲腥、又有幾隻醃唔勻好鹹，但個蛋嘅口感正合我意，加返分泰菜特色名菜之一——咖哩麵包盒，搭口味正宗嘅青咖喱，味道帶辣，幾香口。配料多到滿瀉呢度嘅咖喱雞選用雞件部位，帶骨，中意吮骨嘅人會buy，但個人喜好雞脾位多啲。次次行完街睇完戲太陽都落山，見佢午市下午茶set都幾抵食，下次如果早啲過嚟可以試吓