麻布茶房 (Closed)

將軍澳雖然大都係商場，但係識得搵，都食到連鎖集團以外嘅好嘢食，今日就嚟咗Popcorn商場食咗個高質日式定食。Menu有好多頁，真係花多眼亂。見餐廳特別推出左豪華午市定食，就一於試吓鹽燒三文魚定食，成個餐$118，配湯同前菜，附送咖啡或茶，仲免費送三色甘味甜品🍮。三文魚好大條，成隻手板咁長，厚差不多2cm。外皮煎得好香脆，特別係三文魚表皮連脂肪嘅一層，食落口好甘香，三文魚味突出，而且肉質鮮嫩，證明烹調時間調校得準確。不過有啲令人失望嘅係麵豉湯，成個湯只係得輕微嘅鹹味，裏邊有非常少蛋絲，味道十分單調...另外叫咗一個白玉霜淇淋蜜豆沙，旁邊有一小瓶黑糖可以自己添加。雖然雪糕溶得好快，同埋偏甜，但配料豐富，裏面有杏脯肉、豆沙、蕨餅、白玉、同埋爽脆嘅啫喱，整體口感和味道不錯，不過份量多啲就好了。