雲魅 (Closed)

香港幾乎每隔幾條街就一定會有間食米線嘅餐廳，我平時都成日會食米線，但好似呢間咁，可以自己逐樣逐樣配料加落去嘅過橋米線就真係第一次見，我覺得好新奇好有趣，所以就去試下啦。有幾個配料set可以揀，每set入面都有10小碟配料，揀完之後就再揀埋湯底同埋米線/七彩面。香格里拉豪華配料、雲魅香辣湯、七彩面 $128難得試一次，一於就試最豪華個set啦。有牛肉、鮑魚、帶子、生菜、酥肉、竹笙、蝦、響鈴、炸醬、芫荽蔥、鵪鶉蛋同蟲草花。一嚟到首先就按照店員嘅教導去逐碟逐碟配料放入熱湯入面淥熟。啲牛肉都幾有牛味，幾好食。個人覺得最正嘅係隻蝦同埋帶子。因為係就咁用熱湯淥熟佢哋，所以唔會煮得過熟，唔會太鞋。隻蝦幾大隻幾彈牙，帶子口感唔錯，味道鮮甜。店員話每款湯底都有用雞熬出黎，而我覺得呢個香辣湯底幾有麻辣燙嘅感覺。七彩面賣相十足，望到都覺得開心。怕啲麵太淋嘅話可以逐少逐少咁放入熱湯。另外值得一讚嘅係呢度嘅店員服務真係幾好，會好主動教我地點樣食用，又不斷主動斟水。