炊豕店 (威靈頓街) (Closed)

豕，豬也。炊豕店當然是以豬做主角，全場以豬肉為主，有豬扒、豬手、肉燥、豬軟骨等主食，除可以追加不同配料外，亦可以揀配白飯、撈粗麵或撈幼麵。還可以選擇多飯加錢，少飯減錢，好實際。小食則有唐揚炸雞、滷水雞翼、麻辣炸魚蛋、涼拌大豆芽、酥炸鳳尾蝦、洋蔥圈、咖哩角和肉燥凍豆腐等供應。點菜紙每人用一張，可自選各種配搭，餐主菜、追加配料、飲品和小食，一目了然，方便易用。係炊豕店，豬扒當然係必吃之選。喜歡人氣推介蔥油豬扒飯，蔥油香味配上豬扒油脂，送飯味道一流。豬扒好大塊，遮蓋碗口，幸廚師細心，先把豬扒切成 4 段，方便客人享用。厚身豬扒炸得好香口，仍保留肉汁，肉腍兼且鮮嫩，配上惹味蔥油和香軟飯粒，再加埋隻追加煎蛋，真系愈食愈滿足。至於叉粒豆角蔥花炒滑蛋，就轉轉口味，改配撈幼麵。蛋漿炒得幼滑，色澤金黃，配上紅潤叉粒和碧綠豆角，賣相對辦。入口蛋漿滑溜，蛋香充沛，叉燒粒肉質鬆化，加埋青脆豆角和彈牙幼麵，配上帶甜醬油和炸蒜，味道好夾。小食肉燥凍豆腐，材料簡單，清香滑溜凍豆腐，配上惹味肉燥，再放上營養豐富的天然調味料木魚花，睇得又食得。