覓食家

Open Now

Now Closed

早就聽聞元朗的「覓食家」以超大隻炸雞肶出位。這天辦完事後剛好在店子附近，便約埋朋友在那裏吃番個午飯。星期日下午非繁忙時間去到，仍等了十分鐘左右才能入座，店子是茶記格局，有少許擠。菜牌選擇方面十隻手指可數。不過，我卻一直深信貴精不貴多的道理。我和朋友分別點了「至識食雞肶煎蛋飯」同「煎豬扒煎蛋飯」，儘管可選黑椒汁或蒜汁，但我們均選了最基本的豉油汁。不一會雞肶飯來了。炸肶幾大吓，佔了隻碟一半位置以上，雖無早前雜誌所見的那麼誇張，但肯定大過一隻手掌。除了飯外還有一隻煎得幾靚仔的太陽蛋同少許青瓜，無什花巧，看來是想突出雞肶的size吧。雞肶醃得還不錯，生炸出來後脆口得來至少不會有雪味。雖然肉汁不算多，但也非乾身，吃來不嚡口，配埋一些甜豉油來撈飯，很快便把東西吃清光了。見朋友吃煎豬扒飯好滋味，我也要了一點嘗嘗。豬扒是厚切，啖啖肉，醃得好入味，而且較炸雞肶更多肉汁，肉質亦不會像下了鬆肉粉的完全沒咬口。整體來說唔會差過區內名店「成記茶寮」好多，但感覺卻較後者乾淨多了。每個套餐價連凍飲都係五十元有找，都算合理有餘，應會吸引我這個區外客再來。