古早味休閒台灣 (Closed)

1個人行行下街有d肚餓,望到對面有呢間古早味,而且仲係下午茶時間,一於試下。本身其實真係唔係咁想入去,因為佢位於女人街旁邊既鋪頭,而且坐位係樓上,感覺唔係咁乾凈,但係見到佢有個豬軟骨滷肉飯我又真係好想試,就以就上左去啦。講真我自己覺得門面就唔係好吸引,不過上到樓上畀我嘅感覺都ok,地板係乾凈既,無濕笠笠,而且卡位都整齊企理。叫左個豬軟骨魯肉飯,加$4熱珍珠奶茶少甜,共$52。好快珍珠奶茶就嚟咗,好開心杯奶茶係熱辣辣而唔係暖,好多時叫熱飲都只係暖既溫度,珍珠比較林身,少甜左之後唔算太甜,而且飲到茶味,幾好飲。唯一扣分既係放左一支膠匙羹落去杯熱辣辣既飲品度,我真係擔心會熱溶。好快個飯都到左啦,賣相好靚,完全唔hea,擺盤好過好多台式小店。豬軟骨估唔到好有驚喜,軟骨非常淋好入味,有兩大舊,雖然係下午茶但份量一啲都唔少,滷肉唔算特別好食不過都不錯,而且夠汁撈曬碗飯