棋哥燒鵝餐室

Open Now

Now Closed

今晚趕住做家務只能去食燒味飯，亞仔的反應係…………啊？我可唔可以唔食啲咁麻甩的飯？一個燒味飯要50個大洋，對於一個已婚男嚟講有啲貴，雙拼再加5蚊。作為一個窮L，當然係慳得一文得一文啦！全家分別叫咗义燒，燒鵝，同切雞，一於自制3拼飯，咁又慳返幾十蚊（大家唔使講，我知道我呃緊自己，多謝！）。只係叫咗普通义燒（無叫肥义因為就老婆同仔），但上碟都有少少肥，肉質非常之冧，比對面的燒味店好食，其實對面的义燒同燒肉我都好鍾意，但8點幾去到已經拉閘所以先食棋哥。燒鵝，登登登登！鵝肉是熱架，冬天食燒味最怕啲肉凍，鵝皮是脆的，而鵝肉同鵝皮都沖積住碳味，呢個味道比我食過中環的，灣仔的，北角的鵝更好味。雞都唔差，肉滑味足。食完飯燙完衫，打埋呢段食評個口好渴，我估同今晚的燒味飯有關，但我都會返轉頭。