鴻星中菜 (瑞安中心) (Closed)

星期日神咁早送主子去香港藝術中心參加話劇，曲目係經典的「白雪公主」。送完主子入去彩排，自不然要搵地方消費一下時間，有咩好得過飲早茶？黎到瑞安中心，好自然會入黎鴻星，呢間鴻星出名貴，勝在服務好又夠就腳。我地叫左幾籠點心，蝦餃皮薄餡靚，原隻鮮蝦夠彈牙。仲有原盅鮑汁鳳爪，新鮮滾熱辣。叉燒菠蘿包菠蘿皮夠脆，叉燒餡夠多。最重要係壺普洱夠水滾茶靚，飲啖茶食個飽，舒服曬！最後仲食返碟紅棗糕補一補血。黎到灣仔飲茶又唔想同人爭，可以諗諗鴻星啦！