康樂茶冰廳

Open Now

Now Closed

雖然話地道港式冰廳執吓執吓買少見少，但係香港仲有唔少呢類具備濃厚香港風情嘅食肆得以保留，多數情況係歸功於家族式多年奮鬥，早就買落個舖，從而得以無懼加租，巍然屹立市井之中。唔講你可能唔知，「冰室」係要比「茶餐廳」更為古老嘅香港早期中高檔食肆。响冷凍設備仲未普及至家家戶戶嘅年代，大熱天時去「冰室」嘆杯冰係何其時髦又威水嘅呢！第一次嚟，就試吓午餐。半夜三更叫午餐，感覺好鬼搞笑。叉燒湯意以薄切燶瘦叉燒為主調，配以烚得稔爽度適中嘅意粉，湯底用上傳統冰室嘅淡口湯底，大叔阿伯所謂識食就係要自己落鹽同埋胡椒粉，鹹淡隨意調味。留意呢種扁平闊面似碟又係碗嘅餐具，雖然外觀貌似老土，其實佢有極其合理嘅實用性—快速散熱！滾熱辣嘅湯粉狀物體放置得越係平坦，散熱就越快，因此用呢種餐具食湯粉，入口嘅温度就剛剛恰到好處。睇吓近鏡。傳統港式火腿奄列係脆邊全熟蛋，口感類似芙蓉蛋飯果一種蛋。現在流行嘅半生熟加奶油滑蛋，舊時唔興。呢度嘅方包口感好得意。睇吓近鏡。識飲一定係飲熱奶茶啦！茶香奶滑温度fit，合格收貨。寫食評，影埋單。完整，收工。