酒鍋 (V Point) (Closed)

今日同朋友嚟銅鑼灣行街，行完之後諗住一齊打個靚邊爐，最後決定嚟呢間環境好好嘅酒鍋 。環境好靚，間隔疏落 坐得好舒服，而且仲有大玻璃，可以望到海景，呢個體驗真係一流。湯底方面選擇都好多，我哋揀咗抗疫先鋒$288，有四格分別四款湯底，包括胡椒豬肚花膠雞湯、杏汁白肺木瓜雪耳湯、麻辣湯、蕃茄紅蘿蔔豬展湯，惹味得來好養生，每個湯底都有各自特色，味道好好同埋好多湯料添！先黎一個「豬」拼盤，圍住成個爐，好靚！有成朵玫瑰花嘅豬肉片、手打蝦丸墨魚丸、黑松露豬肉餃、韭菜餃，賣相好靚而且質素好好。各款丸嘅味道同埋口感感覺都係比一般火鍋店特別，真係有種手打嘅感覺。黃金炸魚皮呢個炸魚皮真係非一般嘅好味，炸到勁脆！脆卜卜，而且好重鹹蛋黃味，雖然好邪惡但真係必點！開心小企鵝呢個賣相都幾得意，因為我哋有小朋友，所以佢哋睇得開心又食得開，呢個小企鵝係墨魚丸，口感都幾彈牙，不錯。頂級手切肥牛牛肉嘅質素真係好好，紋理分明，肥瘦平均，口感非常軟嫩，牛味又夠重！好正。最後我哋仲嗌左佢嘅竹蔗茅根同埋紫貝天葵，唔算甜，好好飲，呢餐火鍋非常滿足！