英皇紅酒扒房 (Closed)

今日帶媽媽食好西，媽媽話唔想去太遠，所以近近地係屋企樓下食。 呢間店已經開咗一段時間，上年聖誕節妹妹食過話好好食，食物質素好好，所以今日同媽媽來試下。 望住個名有啲似係酒吧，仲有幾張室外座，可以坐喺外面吹着涼風飲酒，入到去原來都係西餐廳格局。 望望Menu，主要係食扒類嘅西餐，好容易就揀到想食嘅野。 餐湯及蒜蓉包雜菜湯有香濃嘅蕃茄味，唔會好鹹，仲食到粒粒肉粒，蒜蓉包香脆而且蒜味香濃，伴着湯吃一流。 美國榖飼牛肉眼 $228牛肉眼有10安士，不過望落好似比10安士仲要大。食既時候店員會主動拎醬汁過嚟比我地揀，揀左黃芥末，味道都唔錯。牛扒揀左medium都幾易切，冇咩韌既感覺。食落牛肉眼有少許嚼勁，夠juicy。伴碟仲有脆薯角，炸得又香又脆。 脆煙肉卡邦尼意粉 $88整個意粉表面都充滿卡邦尼醬汁，將醬汁撈勻意粉後絕冇乾身既感覺。意粉入口又滑又creamy，雖然未有好彈牙既程度，但絕對夠腍唔硬，食既時間中間仲有脆煙肉提升口感，媽咪話好好食。 餐飲凍檸茶要自己落糖的，冇一般茶餐廳咁甜，茶味都夠濃。媽媽大讚呢度價錢唔貴，而且食物質素好，相信呢度好快就變咗我嘅家庭食堂。