利寶閣 (Closed)

上次食完利舞臺的利寶閣之後，意猶未盡，原來尖沙咀The One都有利寶閣，於是再次encore！星期一夜晚嚟食唔使排隊， 環境比銅鑼灣新，少一點古色古香。店員服務態度尚算好，但欠缺主動，不像利舞臺利寶閣的侍應，不會幫你斟茶遞水。谷飼豚肉叉燒飯 配 原盅佛跳牆（hkd $188）原盅佛跳牆依然超足料，超豪華！除了有鮑魚、遼參、魚翅、花膠、瑤柱等矜貴食材，仲有雞腳、花菇、蹄根等等。湯底好鮮，飲完好暖胃，好滿足，而且鮮甜十足！絕對對得住呢個價錢！至於個黯然銷魂飯，叉燒今次略瘦，少一點油脂，肉質鮮嫩，口感尚算軟腍！上湯焗龍蝦伊麵 (hkd $288) 今晚食好少少，叫咗個龍蝦伊麵。龍蝦好多肉，好有份量，絕無欺場，肉質爽口彈牙，肉質潔白細嫩、唔霉，味道都好鮮。乾濕度視乎個人口味，個人鍾意茨汁收得緊一點，呢個茨汁稍為小一點，啱啱好。今次埋單嗰時免費送上甜品綠豆沙，好多沙，比起紅豆紫米露更不錯！