羅麥記 (Closed)

團購做緊優惠，倆口子來試試。環境裝修好有心思，比較懷舊，好多舊香港茶記嘅元素，坐得舒服！粒粒紅豆奶茶冰必叫！奶茶好香好滑，紅豆有咬口，而且面頭有三粒紅豆mix奶茶冰，食落好似沙冰，咁樣就唔會因爲溶冰而令到杯奶茶溝淡哂！羅麥雞翼撈通粉羅麥汁類似瑞士汁，但比瑞士汁杰身同甜，撈通粉幾特別，不過略嫌太多汁，食得多就變鹹！雞翼有四隻大大隻，唔算入味但肉質滑，無雪味！最後嗌埋個羅麥記招牌菜磚頭焗豬扒飯上枱時熱辣辣，望落都幾有睇頭！切開裡面係白飯+小小蛋絲，有點失望，因為本來預係炒飯底。豬扒屬於一般豬扒貨色，落左好多梳打粉鬆肉。值得一讚嘅係個茄汁配麵包磚！我地寧願食哂成個麵包都唔想食白飯，試一次就夠喇...