GoNuts. (Closed)

將軍澳真係有好多充滿特色同情調嘅餐廳～今次黎到呢間裝修色調偏橙系、幾modern 嘅餐廳享用我哋晚餐，感受悠閒嘅一晚～✎ 白松露油野菌貓耳朵意粉 材料有油野菌、核桃、洋蔥同埋貓耳朵意粉。整體相對creamy 同濃味，貓耳朵意粉口感腍身，核桃切成碎粒，其酥脆嘅口感同軟嫩嘅油野菌同埋貓耳朵意粉配搭，形成豐富層次，食落油膩感唔多，比較健康，而且份量都算多，食哂都幾飽下！✎ 龍蝦汁蟹肉意大利飯 飯唔會太硬但同時保留咬口，黏黏口感，同樣好creamy。先食蟹肉再食意大利飯比較好，因為意大利飯伴龍蝦汁，嗰種龍蝦味非常濃郁，會蓋咗蟹肉味。另外材料亦有切粒嘅秋葵同埋蕃茄粒，味道層次多變，同時減輕油膩感，平衡得幾好！份量都多！✎ 梳乎厘班戟配蜂巢蜜牛油黑糖漿 班戟好鬆軟Q彈，入口即融！班戟上面有黑蜂蜜牛油，淡淡牛油味，味道微甜，食到唔會覺得膩好有幸福感～啲cream 綿滑細膩，班戟加埋糖漿，入口更幸福滿滿！✎ 藍檸檬梳打檸檬同梳打味都好重，清新感滿滿。✎ 雜莓熱果茶微酸，淡淡雜莓香。