Steak Bar (Closed)

作為一個牛魔王梗係唔會放過食牛牛嘅地方🤩坐底之後服務員好細心，根據牛肉嘅質感同味道作簡單介紹，我地揀左吉列炸和牛扒同頂級板腱牛扒各一set，另外加一客和風紫菜薯條。吉列炸和牛扒將牛扒放上爐烤一烤，自己烤到適合嘅熟度，我就鍾意五成熟，烤到咁上下聞到好香牛味，咬落去肉質嫩腍，和牛油香充斥住成個嘴。曾經炸過嘅外皮帶有另外一種脆脆口感同油潤香味，令整體味道更加豐富。再點上少少酸酸甜甜嘅燒汁，更加帶出牛味。頂級板腱牛扒（每日限量供應）我地點五成熟，廚師烹調牛扒熟度岩岩好，切開望上去明顯冇吉列牛咁多脂肪，口感方面比較厚實，但呢個部位嘅牛肉勝在牛味夠濃，咬落夠juicy，呢個牛點蒜鹽同燒汁都好夾好好食。每個set都跟一碗飯，上面有芝麻、小魚乾絲同紫菜碎令到個飯鮮味培增，超級好食。沙律酸酸甜甜好開胃。芝麻汁豆腐亦令人感覺到冰涼清新。和風紫菜薯條平時食呢啲薯條都會擔心唔夠味，係呢度完全唔洗擔心呢個問題，熱辣辣嘅薯條之間有好多紫菜碎，撈得好均勻，唔洗點茄汁已經好好味。食飽飽感覺好滿足，下次如果有朋友想食牛，一定會帶佢過黎試試。🤤