金不換泰國餐廳 (Closed)

揀午餐，十五十六，瞄到隔離枱個原隻菠蘿炒飯，即時有決定。理智警告係咪用「環保菠蘿」，唔理咁多，呢一刻真係好想食。配料有蝦、鮮魷、魚肉蟹柳、提子乾、菠蘿、雜菜、臘腸粒，置頂的豬肉鬆份量唔多，但令個飯變得可愛，亦豐富咗味道。飯夠熱，飯粒分明，上色均勻，調味剛好。蝦腸已被剔走，讚！臘腸配菠蘿好夾，個飯食落清新多過油膩，自己食晒碟飯都冇肥咗幾磅的內疚。蝦、鮮魷呢兩種食材，同時出現喺濕炒海鮮河，另有甘筍、草菰、大量芥蘭、魚柳同超多汁，好彩個汁唔係好鹹。河粉唔係炒牛河咁一條條，反而係一舊舊咁墊底。粉，真係唔多，不過食埋啲餸係夠飽。餐飲泰式熱奶茶夠香濃，有泰式奶茶的特別回香，唔使自己落糖都夠甜。飯腳叫咗凍飲，店員送上飲品時，想將一支飲管放落枱，飯腳同店員講走飲管，店員回贈甜美笑容加句多謝，我哋即時心花放喔。