大豐澳門翠苑餐廳 (Closed)

澳門大豐坐落於青衣灝景灣商場的茶餐廳，我地一家大細時不時都會幫襯，今日襯課外活動後就過黎醫肚。貴妃娘娘叫左海南貴妃雞套餐，朕叫左貴妃雞魚湯泡飯，格格同小阿哥就食烏冬。先講朕的魚湯貴妃雞泡飯，我就鍾意佢個奶白魚湯鮮甜，加入莞茜、絲瓜、秀珍菇，成件事好夾。貴妃雞浸入個湯裡面，魚湯吸收埋淡淡雞油香，鮮味再昇華到另一層次，每次食呢個飯朕都會飲埋個湯。絲苗米浸湯後粒粒飽滿，非常易入口，故每當朕龍體違和嘅時候都必定要食呢個泡飯，飲完個湯成個人暖笠笠出一身汗頓時感到渾身舒暢。如果想食滑雞，就要試呢個海南貴妃雞飯。雞肉滑一滑，配埋個白飯清清地真係洽度好處（唔似得出面用油飯咁油膩），仲有醃過的酸蘿蔔絲好開胃。至於個照燒雞扒手打烏冬分量十足，蕃茄蘿仔洋蔥濃湯配以爽滑的手打烏冬，仲有炆到好淋的牛腩肉，營養價值高，最岩成長期嘅小朋友。仲有大大塊日式照燒雞扒，好香口。美中不足係由於塊雞扒碎上，令肉汁流失，食落有少少乾。澳門大豐一直做街坊生意，以價錢平質素高作招徠，深得朕心，值得長期支持！