大灰熊廚房 (Under Renovation)

一位住將軍澳既朋友推介我黎呢間中式小廚，果然好食，價錢又合理，朋友係無飯主婦，唔怪之得成為佢一家既開飯食堂。一向鍾意飲中式湯水，所以一人叫左一個姬松茸燉湯，燉湯真材實料，有姬松茸、雞腳、瘦肉，仲無添加味精，每一啖湯都充滿濃郁菇菌味，忍唔住一口氣飲哂一盅。頭盤小食叫左黃金豆腐粒，豆腐外皮金黃香脆，豆腐熱辣辣軟腍腍，面頭灑上蒜粒，香口美味!小菜叫左2款: 千島蝦球、拔絲咕嚕肉，食埋主菜就再引證呢間餐廳有一定既水準。千島蝦球 : 粒粒蝦球都大大隻而且炸到香脆，千島汁好適合呢個咁熱既天氣，令到人胃口大開。拔絲咕嚕肉 : 又係一款開胃小菜，咕嚕肉既肉質半肥半瘦，食落有爽口感覺，係靚肉質部位，唔似一般樓酒啲肉質咁”鞋口”。總括呢餐係一餐令人滿足既晚飯，仲不時聽到隔離枱食客話食物好味道，餐廳地點雖較遠但一定值得再去。