博派麵館 (Closed)

呢間用變形金剛做主題嘅米線店好有特色，好難得見有食肆搵模型角色做招徠，而且認真程度值得一讚，唔單止門口有隻應該有兩米高嘅大黃蜂係度夠晒型格，仲識發光，而枱上嘅柯柏文裝住辣椒油，好有新意。店內主推炸珍珠奶茶，咁梗係要試吓。估唔到真係幾有驚喜，係一粒粒炸到金黃嘅炸物爾配埋煉奶，先蘸一下煉奶再入口，表皮果然炸得好香脆，個饀好煙韌而且好香奶茶味，仲有一粒粒嘅珍珠係入面，完美呈獻返珍珠奶茶嘅味道同口感，唔怪得係店內推介。燒安格斯牛肉牛舌湯麵標榜每天煲製，食落果然好香濃之餘無味精感，個湯可以放心飲，而牛舌好肥厚而且燒得好香，好值得食。酸辣小窩紅薯粉($48)，有好多餸係面，滿到一睇就覺得物超所值，有豬腸、豬軟骨、雞翼尖等，而個湯底同樣係熬製而成，所以唔會有好重味精嘅感覺，難得地酸辣湯底都可以放心飲落肚。蒜香燒金菇，金菇同蒜蓉一向都係perfect match，而呢度嘅整法係加埋炸蒜同蔥，令到個香味再高一個層次、豐富。