野郎Stone Ya Rou Stone

Open Now

Now Closed

前幾日行一田行到有啲肚餓，就決定係入面餐廳買個外賣。見到呢間嘅牛肉好吸引，而且外賣仲有折，於是就買黎試下啦。生薑豚肉飯（$44）一打開見到個份量都唔算少，幾多肉同洋蔥，而且仲有飯素都幾驚喜。生薑燒好多汁，不過食落覺得好濃味，係會越食越鹹嘅，所以如果食開淡口味嘅可能會麻麻地。咖喱牛舌飯（$38）咖喱牛舌飯價錢幾平，而且份量都幾多，有好多塊牛舌同蔬菜配料。啲牛舌煮得好軟好好味。以日式咖喱黎講呢款算係辣咖喱，同埋入面嘅洋蔥係生洋蔥，所以會越食越辣。芝士和牛漢堡扒（免費！！）其實本來想叫芝士和牛漢堡扒飯，但咁啱見到隔黎貼住張poster話下載個app會送一塊和牛漢堡扒，即刻用app黎試下。本來以為免費送嘅漢堡扒會好細塊，點知一見到個size嚇親，真係好大塊，有成隻手掌咁大，而且仲好厚！入面有啲洋蔥，食落口感同味道都幾香。不過可能因為太大塊，入面唔係好熟、生生地，食落仲有少少凍，要自己再煎下先好啲。整體黎講三個外賣都偏重口味，但以呢個價錢黎講算幾好。買嘅時候店員有講返大概需要15分鐘左右，係一田行一陣再返黎拎就啱啱好啦。