Toast Luck (希慎廣場) (Closed)

一直好想食韓式吐司，呢排去開銅鑼灣聽朋友推介一間係Hysan food court嘅韓式吐司好爆餡就一於去試吓啦！韓式吐司有成十餘款，花多眼亂就揀咗個海鮮匯集嘅脆墨蝦博士吐司，健康啲可加埋增量蔬菜，多咗生菜同蕃茄，食落感覺良好啲，營養更balance！一拎上手特別重手，皆因佢真係幾巨型～好彩同朋友一齊分享，唔係一個人食全份都已經會飽咗！切開後睇到佢嘅層次，主角炸蝦餅同墨魚圈仲帶啲炸物嘅脆感，蝦餅食到蝦粒都幾鮮，加埋蜜糖芥末醬後濕潤啲，仲有新鮮蔬菜同酸瓜清脆嘅配合，確實唔錯！韓式吐司一大特色就係吐司本身會帶甜味，甜甜咸咸嘅配搭又幾受落喎！飲品選擇都相當多，其中凍濟州鮮奶抹茶嘅抹茶味真係幾濃，凍飲其實上半部帶點沙冰形態，有啲令我回想返幾年前飲嘅星x克星冰樂，總之就係好飲啦！同吐司組合嘅套餐價都相對抵食，絕對係輕食之選，推介啊！