L'attitude (Closed)

今日同朋友嚟咗一間好得意嘅餐廳 L’attitude。周圍都有熊仔、兔子同埋雞仔嘅裝飾，天花板仲吊住軟綿綿嘅雲朵，好可愛啊！雖然我地係下午茶時間黎，但由於無食午餐嘅關係，都叫左唔少野食。呢度嘅下午茶餐唔算貴，大約＄40就有交易。Set D嘅碳燒香茅豬頸肉幾爽口好入味，似乎落咗好多香料，如果配河粉一定好正！除咗豬頸肉我哋仲叫咗一個昆布海鮮冬菇豆腐湯鍋，清清地但係又幾好味喎！有爽口嘅蝦、青口同埋蟹柳。昆布湯唔單止好好飲，仲比豆腐索曬啲味。飲品方面，我地叫左兩杯星空系列同埋一杯酒精飲品。星空系列係蝶豆花飲料，店員係入面擺咗一粒會發光嘅膠冰粒，好夢幻！Los Angeles加左檸檬蜂蜜所以比較適合嗜甜嘅朋友。Paris就係玫瑰檸檬，味道較酸，解膩一流！Cocktail方面，Imperial甜度幾高，將棉花糖溶埋落去好容易入口。最吸引我嘅就係呢個雞仔軟雪糕啦！造型真係好得意，唔捨得食添！雪糕幾滑，有少少牛奶香，撈埋棉花糖食又係另一種滋味。總括黎講，呢間可愛嘅餐廳唔會「得個樣」，食物除左好睇都幾好味，啱曬童心未泯嘅女仔！