古早味休閒台灣 (Closed)

朋友介紹話古早味又抵食又多選擇，梗係要嚟驗證下啦！！餐牌上真係好多小食，仲有唔同嘅地道小食，例如台南，宜蘭等。除此之外，甜品選擇更有成四五頁，比起一般台式餐廳多，睇到我地眼花撩亂呀！下面呢頁係另一頁新甜品推介，都好吸引。一定要點刈包因為香港唔多地方有。刈包就係類似饅頭夾滷肉，呢度嘅刈包細細個，每個人share食兩三啖，裡面大大塊滷肉半肥瘦咁好滿足。前排去台南食過擔仔麵，佢本身係一個點心，貴精不貴多，所以係細細碗而且麵量大概兩口食完，有蒜粒，韮菜等少少配料。呢度嘅擔仔麵唔係太大碗符合傳統，有蛋有肉丸有滷肉，但略油左啲同埋味道普通。台灣地道野食點少得滷肉飯，呢碗滷肉飯大碗，自己一個食會飽。滷肉一樣又淋又入味，如果畀多啲汁會更好食！五味透抽，即五味魷魚，雖然唔知落左邊五味，但酸酸甜甜好好食。叫左芋香牛奶同胚芽奶綠，每杯都係$18幾大杯，胚芽好飲。甜品揀左好耐，實在太多款，但因為食完前面嗰啲已經有啲飽，最後揀左個清新嘅玫瑰味刨冰，有真玫瑰花瓣，醬夠多，食到底都仲有味，另外仲有好多水果，令人滿足。新品炸芋圓都唔錯，香脆有口感。食左咁多野，加埋一埋單每人唔洗$200算抵食。