二把手

Open Now

Now Closed

最近旺角新開咗間串燒店，最平$10就有交易，性價比甚高，從肉類到菜品，仲有主食同自家創製Taco，唔怕食唔飽，環境舒適，地點方便，適合同朋友仔嚟小聚一下！串燒選擇好多，大部分係兩串起，肉類有雞軟骨、墨魚腸、豚肉秋葵、多春魚、牛肉青蔥卷等，個人最鍾意雞軟腸同煙肉車厘茄，前者調味啱啱好，唔會過鹹要狂飲水，後者熱辣辣，香氣十足，帶點咬口，食落又juicy，encore之選！蔬菜有粟米、長蔥、甜薯、冬菇、菠蘿、翠玉瓜、菠蘿等，新鮮，鮮甜，美味，食吓菜幫助解膩，感覺更加健康🤣 呢度嘅翠玉瓜整得好出色，鎖緊汁，完全唔乾，大癲！枝豆暖笠笠，十分貼心，越食越過癮，配串燒好match～ 最後一定要留肚食呢到嘅Taco，日式版本，以炸紫菜做餅底，放上壽司飯，再搭配自選配料，要咗蟹棒，咬落脆卜卜，層次感豐富，味道調配適中，食完都幾飽肚，值得一試！