神石燒牛扒水產專門店 (淘大商場1期) (Closed)

我哋嘅天才正苦禁食肆做晚市堂食，嗰啲較難做外賣嘅食肆真係唔知點捱過呢一關😢，例如專賣石燒牛扒嘅呢一間。好彩佢哋窮則變，變則通，即刻出咗外賣食材優惠，$100 有兩塊靚牛扒，仲有 $68 隻法國黃油雞，同埋 $200 七包即食餸菜包，抵食到冇朋友。疫情減緩之後，真心推薦大家去幫襯一下，尤其係佢哋嘅午餐，$50 起就有交易，好抵食，供應時間仲要由十二點去到六點😮。上次幫襯，叫咗塊 150g 嘅神石美國天然牛扒，睇住塊扒喺嚿熱石上面由生慢慢變熟，一路發出吱吱聲響，感覺好興奮🤗。建議牛扒就咁切嚟食，千祈唔好送飯，咁先至最能食出牛嘅鮮味。剩係幹掉塊扒都飽咗大半，跟住就可以食埋沙律，味噌湯同白飯。之前幫襯過元朗嘅神火山石牛扒專門店有無限飯素供應，撈飯一流，呢間冇，唯有用味噌湯嚟撈飯，雖然寡咗少少，但係日本珍珠米飽滿彈牙，都唔錯㗎。