安南小館 (形點) (Closed)

最近家姐搬咗去元朗住，所以成日同佢去 Yoho Mall 行街，兩個人搵嘢食，見到門口張 poster 有晚市套餐，兩個人先至$398，有好多個餸，入到去坐低準備落單，個侍應話今晚D桂花魚大大條好好肉，問我地試唔試下另一個二人餐，有炭燒豬頸肉沙律、椒鹽大頭蝦、明爐香茅青檸桂花魚、越式咖喱肉鬆炒飯、雜菌炒西蘭花、甜品仲有得揀椰汁粟米糯米或椰青果凍，但比另一個香蔥雞套餐貴$100（二人共$498），諗諗下都想食椒鹽大頭蝦，就試下呢個$498二人套餐。好快就黎咗個豬頸肉沙律，豬頸肉燒得幾香，好爽口。再黎椒鹽大頭蝦，最初以為二人餐應該有兩隻大頭蝦，點知原來有四大隻，食完都飽咗一半，好惹味，正！再黎條魚，又係好大條，厚肉得黎又好滑喎，個汁酸酸地，香茅味好出，可以當湯飲。雜菌炒西蘭花無乜特別，中規中矩。跟住碟炒飯又係大大碟，我地已經飽到食唔落，所以打包拎走留返第二日食。就算幾飽都要食甜品，本來想食椰青果凍的，但果凍已經售罄，我又唔想食糯米咁飽，個女經理好好人，幫我轉咗做芒果 pancake，上面仲有一球椰子雪糕，好香濃椰子味，仲食到有小小椰絲，真材實料，好開心。呢個套餐真係超抵食，三個人食都一定夠